ആരോഗ്യരംഗത്തെയും ഫുട്ബോളിനെയും ഒന്നിപ്പിച്ച് കൂടുതൽ ആളുകളെ അടിയന്തര സാഹചര്യങ്ങളിൽ ജീവൻരക്ഷാ ഇടപെടലുകൾക്ക് പ്രാപ്തരാക്കാൻ ബേബി മെമ്മോറിയൽ ഹോസ്പിറ്റലും (ബി.എം.എച്ച്) കേരള സൂപ്പർ ലീഗ് ഫുട്ബോൾ ക്ലബായ ഫോഴ്‌സ കൊച്ചിയും ഒന്നിക്കുന്നു. 'ലൈഫ്‌ലൈനർ 365' (LifeLinER 365) എന്ന് പേരിട്ടിരിക്കുന്ന പദ്ധതിയിലൂടെ ഒരു വർഷത്തിനുള്ളിൽ ഒരു ലക്ഷത്തിലധികം ആളുകൾക്ക് പ്രഥമശുശ്രൂഷാ പരിശീലനം നൽകുവാനാണ് ലക്ഷ്യമിടുന്നത്.

ബി.എം.എച്ചും ഫോഴ്‌സ കൊച്ചിയും സംയുക്തമായി കൊച്ചിയിൽ നടത്തിയ വാർത്താസമ്മേളനത്തിലാണ് പുതിയ പദ്ധതി പ്രഖ്യാപിച്ചത്. ബി.എം.എച്ച് ഡയറക്ടർ ഡോ. വിനീത് എബ്രഹാം, ബി.എം.എച്ച് കോഴിക്കോട് എമർജൻസി ഡിപ്പാർട്ട്മെന്റ് ഹെഡ് ഡോ. ഫാബിത്ത്, ഫോഴ്‌സ കൊച്ചി പ്രസിഡന്റും ഡയറക്ടറുമായ നസ്ലി മുഹമ്മദ്, സെക്രട്ടറിയും ഡയറക്ടറുമായ ഷമീം ബക്കർ, ഫോഴ്‌സ കൊച്ചി പരിശീലകൻ വിറ്റൽ ബോർക്കൽമാൻസ് എന്നിവർ പങ്കെടുത്തു.

അടിസ്ഥാന പ്രഥമ ശുശ്രൂഷ, സി.പി.ആർ, ചോക്കിങ് (ശ്വാസതടസ്സം) നേരിടാനുള്ള ജീവൻരക്ഷാ മാർഗങ്ങൾ എന്നിവയ്‌ക്കൊപ്പം ഹൃദയാഘാതം, പക്ഷാഘാതം തുടങ്ങിയ അത്യാഹിതങ്ങൾ തിരിച്ചറിഞ്ഞ് കൃത്യസമയത്ത് ഇടപെടാനുള്ള പരിശീലനവും പദ്ധതിയുടെ ഭാഗമായി നൽകും.

ഫോഴ്‌സ  കൊച്ചിയിലെ കളിക്കാരും ഹെഡ് കോച്ചും 'ലൈഫ്‌ലൈനർ 365' പദ്ധതിക്ക് പൂർണ പിന്തുണ നൽകും. ഫോഴ്‌സ കൊച്ചി ഫുട്ബോൾ ക്ലബിന്റെ കളിക്കാർ, പരിശീലകർ, ആരാധകർ എന്നിവർക്ക് പ്രഥമശുശ്രൂഷാ പരിശീലനം നൽകും. ക്ലബ്ബിന്റെ മത്സര വേദികളും ഇതിനായി ഉപയോഗപ്പെടുത്തും. മത്സര ദിവസങ്ങളിൽ ലൈഫ്‌ലൈനർ ഫാൻ സോണുകളും അടിയന്തര പ്രതികരണവുമായി ബന്ധപ്പെട്ട പരിശീലന പരിപാടികളും സംഘടിപ്പിക്കും. ഇതിലൂടെ ഫുട്ബോൾ ആരാധകർക്ക് അടിയന്തര ആരോഗ്യ സാഹചര്യങ്ങളിൽ എങ്ങനെ പ്രതികരിക്കണമെന്ന് നേരിട്ട് മനസ്സിലാക്കാനും പരിശീലിക്കാനും കഴിയും.

വിദ്യാർത്ഥികളും അധ്യാപകരുമടക്കം സമൂഹത്തിലെ വിവിധ തുറകളിലുള്ളവരിലേക്ക് ജീവൻരക്ഷാ പരിശീലനം എത്തിക്കുന്നതിനായി സ്കൂളുകൾ, കോളേജുകൾ, ഓഫീസുകൾ, പൊതുവേദികൾ എന്നിവ കേന്ദ്രീകരിച്ചും പരിശീലന പരിപാടികൾ സംഘടിപ്പിക്കും. പരിശീലനം നേടുന്നവരുടെ വിവരങ്ങൾ സൂക്ഷിക്കുന്നതിനും ഒരു വർഷത്തിനുള്ളിൽ ഒരു ലക്ഷത്തിലധികം ആളുകൾക്ക് പരിശീലനം ലഭിച്ചുവെന്ന് ഉറപ്പുവരുത്തുന്നതിനും 'ലൈഫ്‌ലൈനർ 365' എന്ന പ്രത്യേക കൗണ്ടർ പ്രവർത്തിക്കും.

സാധാരണക്കാർ ഉൾപ്പെടെ കൂടുതൽ ആളുകളിലേക്ക് അടിയന്തര രക്ഷാപ്രവർത്തന പരിശീലനം എത്തിക്കുകയെന്ന ലക്ഷ്യത്തോടെയാണ് 'ലൈഫ്‌ലൈനർ' പദ്ധതി ആരംഭിച്ചതെന്ന് ബി.എം.എച്ച് ഡയറക്ടർ ഡോ. വിനീത് എബ്രഹാം പറഞ്ഞു. ആർക്കും എവിടെവെച്ചും അടിയന്തര ആരോഗ്യപ്രശ്നങ്ങൾ ഉണ്ടാകാം. അത്തരത്തിലുള്ള സാഹചര്യങ്ങളിൽ ആദ്യത്തെ ഏതാനും മിനിറ്റുകൾ ജീവൻ രക്ഷിക്കാൻ അതിനിർണായകമാണ്. 

കേരളത്തിന്റെ പ്രിയപ്പെട്ട ക്ലബ്ബായ ഫോഴ്‌സ കൊച്ചിയുമായുള്ള പങ്കാളിത്തത്തിലൂടെ ഈ പദ്ധതി കൂടുതൽ വലിയൊരു തലത്തിലേക്ക് വ്യാപിപ്പിക്കുകയാണ്. കളിക്കാർ, കോച്ചുകൾ, സപ്പോർട്ടിങ് സ്റ്റാഫ്, ഒപ്പം ആയിക്കണക്കിന് ആരാധകർ എന്നിവരിലേക്ക് എളുപ്പത്തിൽ എത്തിച്ചേരാൻ ഈ പങ്കാളിത്തം വഴി സാധിക്കും. അടിയന്തര സാഹചര്യങ്ങൾ തിരിച്ചറിയാനും, കൃത്യമായ രീതിയിൽ പ്രതികരിക്കാനും, വിദഗ്ധമായ ചികിത്സ ലഭിക്കുന്നത് വരെ ആവശ്യമായ സഹായം നൽകാനും കഴിയുന്ന ഒരു വലിയ സമൂഹത്തെ വാർത്തെടുക്കുകയാണ് ഞങ്ങളുടെ ലക്ഷ്യം. 

Summary : Baby Memorial Hospital (BMH) and the Kerala Super League football club, Forza Kochi, have joined forces to equip more people with the skills to perform life-saving interventions during emergencies. The initiative, titled 'LifeLinER 365', aims to provide first aid training to over one lakh people within a year. As part of the 'Lifeliner' initiative, life-saving training programs have been conducted in over 400 government and private institutions—including schools, colleges, and community centers—within a year. Through this, more than 35,000 people have already been trained.

ഒരു ലക്ഷം പേർക്ക് പരിശീലനം നൽകുക എന്നത് വലിയൊരു ലക്ഷ്യമാണെങ്കിലും, ഈ കൂട്ടായ്മയിലൂടെ സമൂഹത്തിന്റെ സുരക്ഷാ ഒരുക്കങ്ങളിൽ വലിയൊരു മാറ്റം സൃഷ്ടിക്കാൻ കഴിയുമെന്നാണ് പ്രതീക്ഷയെന്ന് ഡോ. വിനീത് എബ്രഹാം കൂട്ടിച്ചേർത്തു.

ബി.എം.എച്ചുമായി ചേർന്ന് പ്രവർത്തിക്കുന്നതിലൂടെ, ഫോഴ്‌സ കൊച്ചിയുടെ സ്വാധീനം ഉപയോഗിച്ച് നിർണായക ഘട്ടങ്ങളിൽ ജീവൻ രക്ഷിക്കാൻ കളിക്കാരെയും ജീവനക്കാരെയും ആരാധകരെയും പ്രാപ്തരാക്കാനാണ് ലക്ഷ്യമിടുന്നതെന്ന് ഫോഴ്‌സ കൊച്ചി സെക്രട്ടറിയും ഡയറക്ടറുമായ ഷമീം ബക്കർ പറഞ്ഞു. ഇതിലൂടെ കൂടുതൽ സുരക്ഷിതവും ഉത്തരവാദിത്തമുള്ളതുമായ ഒരു ഫുട്ബോൾ സമൂഹം കേരളത്തിൽ വാർത്തെടുക്കാൻ കഴിയുമെന്നാണ് പ്രതീക്ഷയെന്ന് അദ്ദേഹം കൂട്ടിച്ചേർത്തു.

'ലൈഫ്‌ലൈനർ' പദ്ധതിയുടെ ഭാഗമായി ഒരു വർഷത്തിനിടയിൽ സ്കൂളുകളും കോളേജുകളും കമ്മ്യൂണിറ്റി സെന്ററുകളും അടക്കം 400 അധികം സർക്കാർ-സ്വകാര്യ സ്ഥാപനങ്ങളിൽ ജീവൻരക്ഷാ പരിശീലന പരിപാടികൾ നടത്തിയിട്ടുണ്ട്. ഇതിലൂടെ ഇതിനകം 35,000-ത്തിലധികം ആളുകൾക്ക് പരിശീലനം നൽകാൻ കഴിഞ്ഞു. ഈ മുൻകാല അനുഭവങ്ങളും പ്രവർത്തന വ്യാപ്തിയുമാണ് കൂടുതൽ വിപുലമായ 'ലൈഫ്‌ലൈനർ 365' പദ്ധതി നടപ്പാക്കാൻ ബി.എം.എച്ചിന് ആത്മവിശ്വാസം നൽകുന്നത്.