ഭാരതി എയർടെൽ (Bharti Airtel) ഇന്ത്യയിലെ ആദ്യത്തെ 5 ജി സ്വകാര്യ നെറ്റ്‌വർക്ക് വിജയകരമായി വിന്യസിച്ചു.

എയർടെല്ലിന്റെ 5G ക്യാപ്‌റ്റീവ് പ്രൈവറ്റ് നെറ്റ്‌വർക്ക് നിർമ്മിച്ചിരിക്കുന്നത് ടെലികമ്മ്യൂണിക്കേഷൻസ് ഡിപ്പാർട്ട്‌മെന്റ് (DoT) അനുവദിച്ച ട്രയൽ സ്പെക്‌ട്രം(Trial spectrum) ഉപയോഗിച്ചാണ്.  ഹൈദരാബാദിലെ കൊമേർഷ്യൽ നെറ്റ്‌വർക്കിലാണ് എയർടെൽ തങ്ങളുടെ 5 ജി നെറ്റ്‌വർക്ക് പരീക്ഷിച്ചത്. 

നോൺ സ്റ്റാൻഡ് അലോൺ (NSA) സാങ്കേതിക വിദ്യയിലൂടെ 1800 MHz ബാൻഡിൽ ലിബറലൈസ്ഡ് സ്പെക്ട്രം വഴിയാണ് എയർടെൽ പരീക്ഷണം നടത്തിയത്.  റേഡിയോ, കോർ, ട്രാൻസ്‌പോർട് തുടങ്ങി എല്ലാ  ഡൊമെയ്‌നുകളിലുമുള്ള എയർടെല്ലിന്റെ നെറ്റ്‌വർക്കിൽ 5 ജി ഉപയോഗിക്കാൻ സാധിക്കുമെന്ന് പരീക്ഷണത്തിലൂടെ വ്യക്തമായി. 

പരീക്ഷണാടിസ്ഥാനത്തിൽ നൽകിയപ്പോൾ രണ്ട് മണിക്കൂർ ദൈർഘ്യം വരുന്ന വീഡിയോകൾ വരെ നിമിഷങ്ങൾക്കുള്ളിൽ ഡൗൺലോഡ് ചെയ്യാൻ സാധിച്ചു. അതായത് നിലവിൽ ഉപയോഗിക്കുന്ന മറ്റ് സാങ്കേതിക വിദ്യകളെക്കാൾ പത്തിരട്ടി വേഗതയിൽ ഇനി മുതൽ 5 ജി നെറ്റ്‌വർക്ക് ലഭിക്കുമെന്ന് എയർടെൽ അറിയിച്ചു. 

ഈ മാസം ജൂലൈ 26 ന് നടക്കാനിരിക്കുന്ന 5G സ്പെക്‌ട്രം ലേലത്തിൽ റിലയൻസ് ജിയോ, വോഡഫോൺ ഐഡിയ, അദാനി ഡാറ്റ നെറ്റ്‌വർക്ക് ലിമിറ്റഡ് എന്നിവക്കൊപ്പം ഭാരതി എയർടെലും ലേലത്തിൽ  പങ്കെടുക്കുന്നുണ്ട്. 600 മെഗാഹെർട്‌സ്, 700 മെഗാഹെർട്‌സ്, 3300 മെഗാഹെർട്‌സ് എന്നിവയുൾപ്പെടെ നിരവധി ബാൻഡുകളിലായി 5ജി എയർവേവുകൾ സർക്കാർ വിൽപ്പനയ്‌ക്ക് വെച്ചിട്ടുണ്ട്. 5G കൂടാതെ, 26 GHz, 800 MHz, 900 MHz, 1800 MHz, 2100 MHz, 2300 MHz, 2500 MHz എന്നീ എയർവേവുകളും ലേലത്തിൽ ലഭ്യമാകും.