ആഗോള സൂചകങ്ങൾ അപകടസാധ്യതയുള്ള ആസ്തികളിൽ നിന്ന് നിക്ഷേപകരെ അകറ്റിയതിനാൽ ബെഞ്ച്മാർക്ക് സൂചികകൾ ബുധനാഴ്ച നെഗറ്റീവ് സോണിൽ അവസാനിച്ചു. ചൊവ്വാഴ്ചയും  അസ്ഥിര വ്യാപാരത്തിൽ ബെഞ്ച്മാർക്ക് സൂചികകൾ താഴ്ന്നിരുന്നു.

ബാങ്കിംഗ് ഓഹരികളിലെ നഷ്ടത്തെ തുടർന്ന് സെൻസെക്സും നിഫ്റ്റിയും ബുധനാഴ്ച നഷ്ടത്തിലാണ് അവസാനിച്ചത്. സെൻസെക്സ് 168.08 പോയിൻറ്( 0.28 ശതമാനം) ഇടിഞ്ഞ് 59,028.91 ൽ അവസാനിച്ചപ്പോൾ നിഫ്റ്റി 31.20 പോയിന്റ് (0.18 ശതമാനം) ഇടിഞ്ഞ് 17,624.40 ൽ ഇന്നത്തെ വ്യാപാരം അവസാനിപ്പിച്ചു. പകൽ സമയത്ത് സെൻസെക്സ്  474.1 പോയിന്റ് വരെ ഇടിഞ്ഞ് 58,722.89 ലെത്തിയിരുന്നു. 

ഇൻഡസ്‌ഇൻഡ് ബാങ്ക്, മഹീന്ദ്ര ആൻഡ് മഹീന്ദ്ര, മാരുതി, ഭാരതി എയർടെൽ, സ്റ്റേറ്റ് ബാങ്ക് ഓഫ് ഇന്ത്യ, ടാറ്റ സ്റ്റീൽ, ഐസിഐസിഐ ബാങ്ക്, എച്ച്‌ഡിഎഫ്‌സി എന്നിവ സെൻസെക്‌സിൽ 1.69 ശതമാനം വരെ ഇടിവ് രേഖപ്പെടുത്തിയപ്പോൾ അൾട്രാടെക് സിമന്റ്, ടാറ്റ കൺസൾട്ടൻസി സർവീസസ്, സൺ ഫാർമ, വിപ്രോ, ബജാജ് ഫിനാൻസ് തുടങ്ങിയ ഓഹരികൾ 4.13 ശതമാനം വരെ ഉയർന്നു. 

ബി‌എസ്‌ഇ സൂചികയിൽ ഓട്ടോ, ബാങ്കിംഗ് ഓഹരികൾ യഥാക്രമം 338 പോയിന്റും 232 പോയിന്റും ഇടിഞ്ഞതോടെ സെക്ടറൽ നഷ്ടത്തിലായി. എന്നിരുന്നാലും, ബിഎസ്‌ഇ മിഡ്‌ക്യാപ്, സ്‌മോൾ ക്യാപ് സൂചികകൾ യഥാക്രമം 117 പോയിന്റും (0.5 ശതമാനം) 212 പോയിന്റും (0.75 ശതമാനം) മുന്നേറി. ബിഎസ്ഇയിലെ 1,322 ഓഹരികൾക്കെതിരെ 2,133 ഓഹരികൾ ഉയർന്ന് അവസാനിച്ചതോടെ വിപണി വീതി പോസിറ്റീവായി. 124 ഓഹരികൾക്ക് മാറ്റമില്ല.

യുഎസ് സെൻട്രൽ ബാങ്ക് പലിശനിരക്ക് ഉയർത്തുന്നത് തുടരുമെന്നാണ് ഏറ്റവും പുതിയ സാമ്പത്തിക കണക്കുകൾ സൂചിപ്പിക്കുന്നത്. ഐഎസ്‌എമ്മിന്റെ (ഇൻസ്റ്റിറ്റ്യൂട്ട് ഓഫ് സപ്ലൈ മാനേജ്‌മെന്റ്) യുഎസ് നോൺ-മാനുഫാക്ചറിംഗ് പിഎംഐ പ്രകാരം, സേവന മേഖല പ്രതീക്ഷിച്ചതിലും ഉയർന്ന നിരക്കിൽ കഴിഞ്ഞ മാസം വികസിച്ചു, ഇത് ആഗോള വിപണികളിൽ സമ്മർദ്ദം ചെലുത്തി. പ്രധാന സൂചികകൾ ആഗോള പ്രവണതയെ പിന്തുടർന്നു. എന്നിരുന്നാലും, മിഡ് & സ്മോൾ ക്യാപ്സ് ശക്തമായ ഔട്ട് പെർഫോമൻസോടെ റാലി നടത്തിയെന്ന് ജിയോജിത് ഫിനാൻഷ്യൽ സർവീസസിലെ റിസർച്ച് മേധാവി വിനോദ് നായർ പറഞ്ഞു, 

ബിഎസ്ഇ ലിസ്റ്റ് ചെയ്ത കമ്പനികളുടെ വിപണി മൂല്യം ഇന്ന് 280.87 ലക്ഷം കോടി രൂപയായി. എക്സ്ചേഞ്ച് ഡാറ്റ പ്രകാരം 1,144.53 കോടി രൂപയുടെ ഓഹരികൾ വാങ്ങിയതിനാൽ വിദേശ സ്ഥാപന നിക്ഷേപകർ ചൊവ്വാഴ്ച നെറ്റ് വാങ്ങുന്നവരായി തുടർന്നു.

അദാനി എന്റർപ്രൈസസ്, എ ബി എഫ് ആർ എൽ, ബ്ലൂ ഡാർട്ട് തുടങ്ങിയ ഓഹരികൾ 52 ആഴ്ച്ചയിലെ ഏറ്റവും ഉയർന്ന നിലയിലെത്തി. ടാറ്റ മോട്ടോഴ്‌സ്, ബജാജ് ഓട്ടോ, ഇൻഡസ്ഇൻഡ് ബാങ്ക് എന്നിവർ നിഫ്റ്റി 50 ലെ ഏറ്റവും കൂടുതൽ നഷ്ടം നേരിട്ടവരായപ്പോൾ ശ്രീ സിമന്റ്, അൾട്രാടെക് സിമന്റ്, അദാനി പോർട്ട്സ് എന്നിവർ നേട്ടത്തിലാണ്.

ഏഷ്യയിലെ സിയോൾ, ടോക്കിയോ, ഹോങ്കോംഗ് എന്നിവിടങ്ങളിലെ വിപണികൾ നഷ്ടത്തിലാണ് അവസാനിച്ചപ്പോൾ ഷാങ്ഹായ് ഉയർന്നു.

മിഡ്-സെഷൻ ഡീലുകളിൽ യൂറോപ്പിലെ ഇക്വിറ്റികൾ കൂടുതലും താഴ്ന്ന നിലയിലായിരുന്നു. 

ചൊവ്വാഴ്ച യുഎസ് വിപണികൾ നെഗറ്റീവ് ടെറിട്ടറിയിലാണ് അവസാനിച്ചത്.

അന്താരാഷ്ട്ര എണ്ണ മാനദണ്ഡമായ ബ്രെന്റ് ക്രൂഡ് 0.99 ശതമാനം ഉയർന്ന് ബാരലിന് 93.75 ഡോളറിലെത്തി.