കൊച്ചി: പുരാതനവും പ്രീമിയവുമായ ബിരിയാണി റൈസ് ബ്രാൻഡുകളിലൊന്നായ മെസ ആഗ്രോ പ്രോഡക്ഷൻസിൻറെ " ബാദ്ഷ '' ബ്രാൻഡ് ബിരിയാണി അരിയുടെ കേരള വിപണിയിലെ വിൽപ്പന വിപുലീകരിക്കുന്നതിന് വിവിധ പദ്ധതികൾ ആരംഭിച്ചു.

വിപണി സാന്നിധ്യം വിപുലീകരിക്കുന്നതിൻറെ ഭാഗമായി ആദ്യഘട്ടത്തിൽ സംസ്ഥാനത്തെ നിലവിലെ ഡീലർമാരുടെ എണ്ണം ഇരട്ടിയായും ഇപ്പോഴത്തെ വില്പന വിഹിതം 10 ൽ നിന്നും 20 ശതമാനമായി വർദ്ധിപ്പിക്കാനുമാണ് കമ്പനി ലക്ഷ്യമിടുന്നതെന്ന് മാനേജിംഗ് ഡയറക്ടർ ഗണേഷ് മെഹ്റ പത്രസമ്മേളനത്തിൽ അറിയിച്ചു. കൂടാതെ വീട്ടമ്മമാർ, പാചക വിദഗ്ദ്ധർ എന്നിവരെ പങ്കെടുപ്പിച്ചുകൊണ്ട് സംസ്ഥാനത്തിൻറെ വിവിധ ഭാഗങ്ങളിൽ പാചക ക്ലാസുകൾ, പാചക മത്സരങ്ങൾ, ഉപഭോക്താക്കൾക്കായി സമ്മാനപദ്ധതികൾ തുടങ്ങി ഒരു വർഷത്തെ വിവിധ പരിപാടികൾ സംഘടിപ്പിക്കുമെന്നും ബ്രാൻഡ് പ്രമോഷൻറെ ഭാഗമായുള്ള റോഡ് ഷോ കൊച്ചിയിൽ ഫ്ലാഗ് ഓഫ് ചെയ്തതായും അദ്ദേഹം പറഞ്ഞു. 

കഴിഞ്ഞ 40 വർഷങ്ങളായി ഇന്ത്യൻ വിപണിയിൽ സജീവ സാന്നിധ്യമുള്ള ബാൻഡ് 1996 മുതലാണ് കേരളത്തിൽ വിതരണം ആരംഭിച്ചതെന്ന് കമ്പനി മാർക്കറ്റിംഗ് മാനേജർ (കേരളം) സതീശൻ ടി.ഇ പറഞ്ഞു. എന്നാൽ ഏതാനും നാളുകളായി കമ്പനിയുടെ ട്രേഡ് മാർക്കിന് സമാനമായ വ്യാജ ബ്രാൻഡുകൾ വിപണി കീഴടക്കിയിരിക്കുകയാണ്. ഇത് ഉപക്താക്കളെയും വ്യാപാരികളെയും കമ്പനിയെയും ഒരുപോലെ ബാധിക്കുന്നുണ്ട്. ഇതിനൊരു പരിഹാരമായി കൂടിയാണ് ഈ ബ്രാൻഡ് പ്രമോഷൻ പരിപാടികളെന്നും അദ്ദേഹം അറിയിച്ചു.

ഉന്നത ഗുണ നിലവാരമുള്ള കൈമ റൈസ് ഉണ്ടാക്കുന്ന ഗോവിന്ദ് ബോഗ് ഇനത്തിൽപ്പെട്ട നെല്ല് കൃഷി ചെയ്യുന്ന പശ്ചിമ ബംഗാളിലെ വർദ്ധമാൻ ജില്ലയിൽ നിന്നുള്ള നെല്ലാണ് പൂർണ്ണമായും ഈ ബ്രാൻഡിൻറെ ഉല്പാദനത്തിന് ഉപയോഗിക്കുന്നത്. നല്ല സുഗന്ധവും മുന്തിയ നിലവാരവുമുള്ള ഈ അരിയെ കൈമ, ജീരക, ബിരിയാണി റൈസ് എന്നീ പേരുകളിലും വിപണിയിൽ അറിയപ്പെടുന്നു. വയലുകളിൽ നിന്നും നേരിട്ട് നെല്ല് ശേഖരിച്ച് ശുദ്ധീകരിച്ചു രണ്ടു വർഷം ആധുനിക സൗകര്യങ്ങളുള്ള സംഭരണശാലകളിൽ സൂക്ഷിച്ച ശേഷം വിവിധ പ്രക്രിയകളിലൂടെ അരിയാക്കും. തുടർന്ന് 50, 25, 5, 2, 1 കിലോ പാക്കറ്റുകളിലാക്കി വിപണികളിൽ എത്തിക്കുന്നു.

ശ്രീ മഹാവീർ ട്രേഡേഴ്സ് ഉടമ ഭാവിക് എം. പോർച്ചേ, സിനിമാതാരം ദേവരാജ് പയ്യന്നൂർ, സംവിധായകൻ ആർ. അജയ് എന്നിവരും പത്രസമ്മേളനത്തിൽ സന്നിഹിതരായിരുന്നു.