പോൽ ആപ് വഴിയും തുണ പോർട്ടൽ വഴിയും അപേക്ഷിക്കാവുന്നതാണ്. വിദേശരാജ്യങ്ങളിലേയ്ക്ക് പോകുന്നതിന് ഈ സൗകര്യം ലഭ്യമല്ല.
തിരുവനന്തപുരം: പൊലീസ് ക്ലിയറൻസ് സർട്ടിഫിക്കറ്റ് സ്റ്റേഷനില്‍ പോകാതെ തന്നെ ലഭിക്കുന്നതിന് ഓൺലൈനായി അപേക്ഷ നൽകുന്നതിനെ കുറിച്ച് കേരള പൊലീസ് വിശദീകരണം നൽകിയിരിക്കുകയാണ്.
ജോലി, പഠനം, റിക്രൂട്ട്മെന്റുകൾ, യാത്രകൾ തുടങ്ങി ഒട്ടേറെ കാര്യങ്ങൾക്ക് ഒരു പൊലീസ് കേസിലും പെട്ടിട്ടില്ല എന്ന് സാക്ഷ്യപ്പെടുത്തുന്ന Certificate of non involvement in Criminal Offences ആവശ്യമാണ്. കേരള പൊലീസിന്റെ ഔദ്യോഗിക ആപ്പ് ആയ പോൽ ആപ്പിലൂടെ ഈ സേവനം പ്രയോജനപ്പെടുത്താമെന്നാണ് പൊലീസ് അറിയിച്ചിരിക്കുന്നത്.
അപേക്ഷിക്കേണ്ട രീതി
1 . പോൽ ആപ് ഇൻസ്റ്റാൾ ചെയ്ത് രജിസ്റ്റർ ചെയ്യുക
2 . സർവീസ് എന്ന ഭാഗത്ത് ചെന്ന് Certificate of Non Involvement in Offences
സെലക്ട് ചെയ്തതിനു ശേഷം ആവശ്യമായ രേഖകൾ അപ്‌ലോഡ്
ചെയ്യുക.
3 . പാസ്പോർട്ട് സൈസ് ഫോട്ടോ, ഫോട്ടോപതിച്ച തിരിച്ചറിയൽ രേഖ, വിലാസം തെളിയിക്കുന്ന ആധാർ പോലുള്ള രേഖകൾ, എന്ത് ആവശ്യത്തിനുവേണ്ടി ആരാണ് നിങ്ങളുടെ സർട്ടിഫിക്കറ്റ് ആവശ്യപ്പെടുന്നത് എന്നതിന്റെ ഡിജിറ്റൽ പകർപ്പുകൾ എന്നിവ ആവശ്യപ്പെടുന്ന സ്ഥലത്ത് അപ്‌ലോഡ് ചെയ്തു നൽകുക.ജില്ലാ പൊലീസ് മേധാവിയിൽ നിന്നാണോ സ്റ്റേഷൻ ഹൗസ് ഓഫീസറിൽ നിന്നാണോ സർട്ടിഫിക്കറ്റ് ആവശ്യമുള്ളത് എന്ന് സെലക്ട് ചെയ്യുക.
4 . വിവരങ്ങളും രേഖകളും നൽകി കഴിഞ്ഞാൽ ട്രഷറിയിലേയ്ക്ക് ഓൺലൈൻ ആയി ഫീസ് അടയ്ക്കുന്നതിന് വേണ്ടി ലഭിക്കുന്ന ലിങ്ക് ഉപയോഗിച്ചു ഫീസ് അടച്ച ശേഷം അപേക്ഷ സമർപ്പിക്കുക.
അപേക്ഷയിൽ പൊലീസ് അന്വേഷണം നടത്തിയതിന് ശേഷം സർട്ടിഫിക്കറ്റ് അനുവദിക്കുന്നതാണ്.
ആപ്പിൽ നിന്ന് തന്നെ ഈ സർട്ടിഫിക്കറ്റ് ഡൌൺലോഡ് ചെയ്ത് പ്രിന്റ് എടുക്കാവുന്നതാണ്.
തുണ പോർട്ടൽ വഴിയും സമാനമായ രീതിയിൽ അപേക്ഷിക്കാവുന്നതാണ്.
വിദേശരാജ്യങ്ങളിലേയ്ക്ക് പോകുന്നതിന് പൊലീസ് ക്ലിയറൻസ് സർട്ടിഫിക്കറ്റ് ലഭിക്കാൻ ബന്ധപ്പെട്ട പാസ്പോർട്ട് സേവാ കേന്ദ്ര / റീജിയണൽ പാസ്പോർട്ട് ഓഫീസിനെയാണ് സമീപിക്കേണ്ടതെന്ന് അപേക്ഷകർ ശ്രദ്ധിക്കണമെന്ന് പൊലീസ് അറിയിച്ചു.
Comments