നാളെ മുതൽ സംസ്ഥാനത്ത് പാൽ ഉത്പന്നങ്ങൾക്ക് വില കൂട്ടുമെന്ന് മിൽമ ചെയർമാൻ കെ എസ് മണി അറിയിച്ചു. 

തൈര്, മോര്, ലെസ്സി, എന്നീ ഉത്പന്നങ്ങൾക്ക് 5 ശതമാനം വില വർധന ഉണ്ടാകുമെന്ന് അറിയിച്ച മിൽമ ചെയർമാൻ കെ.എസ്.മണി നാളെ തന്നെ വില വർദ്ധനവ് പ്രാബല്യത്തിൽ വരുമെന്നും പറഞ്ഞു. എത്ര രൂപ കൂടുമെന്നത് വൈകീട്ടോടെ അറിയാനാകുമെന്നും മിൽമ ചെയർമാൻ വ്യക്തമാക്കി.

നാളെ മുതൽ അരി, പയർ, പാലുൽപ്പന്നങ്ങൾക്ക് 5 ശതമാനം ജിഎസ്‍ടി പ്രാബല്യത്തിൽ വരുന്ന സാഹചര്യത്തിലാണ് വില കൂട്ടാനുള്ള മിൽമയുടെ തീരുമാനം. പാക്കറ്റിലുള്ള മോരിനും തൈരിനുമടക്കം 5 ശതമാനം നികുതി ഏർപ്പെടുത്തിയ ജിഎസ്‍ടി കൗൺസിൽ തീരുമാനം നാളെ മുതലാണ് നിലവിൽ വരുന്നത്. പാക്കറ്റിലാക്കിയ (പ്രീ പാക്ക്ഡ്) അരി, മാംസം, മീൻ, തേൻ, ശ‌ർക്കര, പപ്പടം എന്നിവയ്ക്കടക്കം എല്ലാ ഭക്ഷ്യവസ്തുക്കൾക്കും 5 ശതമാനം നികുതി നാളെ മുതൽ പ്രാബല്യത്തിൽ വരും. കഴിഞ്ഞ മാസം അവസാനം ചേർന്ന ജിഎസ്‍ടി കൗൺസിൽ യോഗമെടുത്ത തീരുമാനമാണ് നാളെ പ്രാബല്യത്തിലാകുന്നത്.

എന്നാൽ, ഏതെല്ലാം ഭക്ഷ്യവസ്തുക്കൾക്ക് ആണ് ഈ നികുതി വർദ്ധനവ്  ബാധകമാകുന്നത് എന്ന കാര്യത്തിൽ ഇപ്പോഴും ആശങ്ക നിലനിൽക്കുകയാണ്. വ്യാപാരികൾ സംശയം ഉന്നയിച്ചതിന് പിന്നാലെ ഇക്കാര്യത്തിൽ വ്യക്തത തേടി സംസ്ഥാനം ജിഎസ്‍ടി വകുപ്പിന് കത്തയച്ചിട്ടുണ്ടെന്നും വൈകീട്ടോടെ മറുപടി കിട്ടുമെന്ന് പ്രതീക്ഷിക്കുന്നതായും ധനകാര്യ വകുപ്പ് വ്യക്തമാക്കി.