കേന്ദ്ര ധനമന്ത്രി നിർമ്മല സീതാരാമൻ വെള്ളിയാഴ്ച ന്യൂഡൽഹിയിൽ ലൈഫ് ഇൻഷുറൻസ് കോർപ്പറേഷൻ ഓഫ് ഇന്ത്യയുടെ (L I C) ഐ പി ഒ ( I P O)യുടെ പുരോഗതി ഡിപാം (DIPAM) സെക്രട്ടറി തുഹിൻ കാന്ത പാണ്ഡെ, എൽഐസി ഓഫീസർമാർ, മറ്റ് മുതിർന്ന ഉദ്യോഗസ്ഥർ എന്നിവരുടെ സാന്നിധ്യത്തിൽ വീഡിയോ കോൺഫറൻസിലൂടെ അവലോകനം ചെയ്തു. ഫെബ്രുവരി ആദ്യവാരം നടക്കാനിരിക്കുന്ന 2022-2023 സാമ്പത്തിക വർഷത്തേക്കുള്ള വരാനിരിക്കുന്ന ബജറ്റിൽ ഇതിനെക്കുറിച്ചുള്ള അപ്‌ഡേറ്റ് പ്രതീക്ഷിക്കുന്നതായി പറയപ്പെടുന്നു.

2022 മാർച്ചിൽ അവസാനിക്കുന്ന നടപ്പ് സാമ്പത്തിക വർഷത്തിൽ എൽ ഐ സി യുടെ പ്രാരംഭ പബ്ലിക് ഓഫറിംഗ് (ഐപിഒ) കൊണ്ടുവരാൻ സർക്കാർ പദ്ധതിയിടുന്നതിനാൽ ഈ മീറ്റിംഗിന് പ്രാധാന്യമുണ്ട്. ലിസ്റ്റ് ചെയ്തുകഴിഞ്ഞാൽ, വിപണി മൂലധനം അനുസരിച്ച് 8-10 ലക്ഷം കോടി രൂപ മൂല്യമുള്ള ഏറ്റവും വലിയ ആഭ്യന്തര കമ്പനികളിലൊന്നായി എൽ ഐ സി മാറാൻ സാധ്യതയുണ്ട്.

സാമ്പത്തിക കാര്യ കാബിനറ്റ് കമ്മിറ്റി (CCEA) കഴിഞ്ഞ ജൂലൈയിൽ എൽഐസിയുടെ ലിസ്റ്റിംഗിന് തത്വത്തിൽ അനുമതി നൽകിയിരുന്നു. എൽ ഐ സി യുടെ ലിസ്റ്റിംഗ് സുഗമമാക്കുന്നതിന് വേണ്ടി 1956 ലെ ലൈഫ് ഇൻഷുറൻസ് കോർപ്പറേഷൻ നിയമത്തിൽ സർക്കാർ 27 ഓളം ഭേദഗതികൾ വരുത്തിയിട്ടുണ്ട്. ഭേദഗതി പ്രകാരം, ഐ‌പി‌ഒയ്ക്ക് ശേഷമുള്ള ആദ്യ അഞ്ച് വർഷത്തേക്ക് കേന്ദ്ര സർക്കാർ എൽ ഐ സി യിൽ കുറഞ്ഞത് 75 ശതമാനവും അഞ്ച് വർഷത്തിന് ശേഷം എല്ലായ്‌പ്പോഴും കുറഞ്ഞത് 51 ശതമാനവും കൈവശം വെക്കും. നിലവിൽ എൽഐസി യുടെ 100 ശതമാനം ഓഹരിയും  സർക്കാരിനാണ്. 

സർക്കാർ ഉടമസ്ഥതയിലുള്ള കമ്പനികളിലെ സർക്കാരിന്റെ ഇക്വിറ്റി കൈകാര്യം ചെയ്യുന്ന ഡിപ്പാർട്ട്‌മെന്റ് ഓഫ് ഇൻവെസ്റ്റ്‌മെന്റ് ആൻഡ് പബ്ലിക് അസറ്റ് മാനേജ്‌മെന്റ് (ഡിപാം), ഗവൺമെന്റിന്റെ ഓഹരി വിറ്റഴിക്കൽ ലക്ഷ്യം കൈവരിക്കുന്നതിന് എൽഐസിയുടെ ഉൾച്ചേർത്ത മൂല്യം കണ്ടെത്തുന്നതിന് ആക്ച്വറിയൽ സ്ഥാപനമായ മില്ലിമാൻ അഡ്വൈസർമാരെ തിരഞ്ഞെടുത്തിരുന്നു. ഭേദഗതി വരുത്തിയ നിയമനിർമ്മാണം അനുസരിച്ച്, എൽ ഐ സി യുടെ അംഗീകൃത ഓഹരി മൂലധനം 25,000 കോടി രൂപയായിരിക്കും. ഇതിനെ   10 രൂപ വീതമുള്ള 2,500 കോടി ഓഹരികളായി തരംതിരിച്ചിരിക്കുന്നു. എൽഐസി ഐപിഒ ഇഷ്യൂ സൈസിന്റെ 10 ശതമാനം വരെ പോളിസി ഉടമകൾക്കായി നീക്കിവച്ചിരിക്കും.

രാജ്യത്തെ ഏറ്റവും വലിയ ഇൻഷുറൻസ് കമ്പനിയായ എൽഐസിയുടെ മെഗാ ഐപിഒ നിയന്ത്രിക്കാൻ 10 മർച്ചന്റ് ബാങ്കർമാരെയും ഒരു നിയമോപദേശകനെയും സർക്കാർ കഴിഞ്ഞ വർഷം സെപ്റ്റംബറിൽ നിയമിച്ചിരുന്നു. ഗോൾഡ്മാൻ സാച്ച്സ് (ഇന്ത്യ) സെക്യൂരിറ്റീസ് പ്രൈവറ്റ് ലിമിറ്റഡ്, സിറ്റി ഗ്രൂപ്പ് ഗ്ലോബൽ മാർക്കറ്റ്സ് ഇന്ത്യ പ്രൈവറ്റ് ലിമിറ്റഡ്, നോമുറ ഫിനാൻഷ്യൽ അഡ്വൈസറി ആൻഡ് സെക്യൂരിറ്റീസ് (ഇന്ത്യ) പ്രൈവറ്റ് ലിമിറ്റഡ്, എസ്ബിഐ ക്യാപിറ്റൽ മാർക്കറ്റ് ലിമിറ്റഡ്, ജെഎം ഫിനാൻഷ്യൽ ലിമിറ്റഡ്, ആക്സിസ് ക്യാപിറ്റൽ ലിമിറ്റഡ്, ബോഫാ സെക്യൂരിറ്റീസ്, ജെപി മോർഗൻ ഇന്ത്യ പ്രൈവറ്റ് ലിമിറ്റഡ്, ഐസിഐസിഐ സെക്യൂരിറ്റീസ് ലിമിറ്റഡ്, കൊട്ടക് മഹീന്ദ്ര ക്യാപിറ്റൽ കോ ലിമിറ്റഡ് എന്നിവരെയാണ്   മർച്ചന്റ് ബാങ്കർമാരായി  സർക്കാർ നിയമിച്ചത്.സിറിൽ അമർചന്ദ് മംഗൾദാസിനെയാണ് ഐപിഒയുടെ നിയമോപദേശകനായി നിയമിച്ചത്.

പൊതുമേഖലാ ബാങ്കുകളുടെ (പിഎസ്ബി) മേധാവികളുമായുള്ള അവലോകന യോഗത്തിലും ധനമന്ത്രി അധ്യക്ഷത വഹിച്ചു. ന്യൂഡൽഹിയിൽ നടന്ന അവലോകന യോഗത്തിൽ, പി‌ എസ്‌ ബി (PSB)കൾ വേണ്ടത്ര മൂലധനം നേടിയിട്ടുണ്ടെന്നും ഭാവിയിൽ ഏത് സമ്മർദ്ദ സാഹചര്യങ്ങളെയും നേരിടാൻ ബാങ്കുകൾ തയ്യാറാണെന്നും തങ്ങൾക്ക് ആത്മവിശ്വാസമുണ്ടെന്ന് ബാങ്കർമാർ കേന്ദ്ര ധനമന്ത്രി നിർമ്മല സീതാരാമനോട് പറഞ്ഞു.