2021-22 ലെ ബജറ്റിൽ രണ്ട് പൊതുമേഖലാ വായ്പാ ദാതാക്കളെ സ്വകാര്യവത്കരിക്കാനുള്ള ഉദ്ദേശ്യം കേന്ദ്രം പ്രഖ്യാപിച്ചതുമുതൽ യൂണിയനുകൾ പ്രതിഷേധത്തിലാണ്. മുംബൈയിലെ ബ്രാഞ്ചുകൾക്ക് മുന്നിൽ ജീവനക്കാർ പ്രതിഷേധ മാർച്ചുകളും പ്രകടനങ്ങളും നടത്തി.
പൊതുമേഖലാ ബാങ്കുകളുടെ സ്വകാര്യവൽക്കരണത്തിനെതിരെ പ്രതിഷേധിച്ച് ഏകദേശം ഒൻപത് ലക്ഷത്തോളം ജീവനക്കാർ രണ്ട് ദിവസത്തെ പണിമുടക്ക് ആരംഭിച്ചതിനെത്തുടർന്ന് രാജ്യത്തുടനീളമുള്ള ബാങ്കിംഗ് ശാഖകളിലെ സേവനങ്ങളിൽ കാര്യമായ സ്തംഭനമുണ്ടായി.
രാജ്യത്തിന്റെ സാമ്പത്തിക തലസ്ഥാനമായ മുംബൈയിലെ ശാഖകൾക്ക് മുന്നിൽ ജീവനക്കാർ പ്രതിഷേധ മാർച്ചുകളും പ്രകടനങ്ങളും നടത്തി. ചില സ്ഥലങ്ങളിൽ ശാഖകൾ പൂട്ടിയപ്പോൾ തൊട്ടടുത്തുള്ള പുറംകരാർ ചെയ്ത ഉപഭോക്തൃ സേവന കേന്ദ്രങ്ങൾ പ്രവർത്തനക്ഷമമായിരുന്നു.
രാജ്യത്തുടനീളം പണിമുടക്ക് വിജയിച്ചതായി യുഎഫ്ബിയു ദേശീയ കൺവീനർ സഞ്ജീവ് കെ ബന്ദ്ലീഷ് ഒരു പ്രമുഖ മാധ്യമത്തിനോട് പറഞ്ഞു. വെള്ളിയാഴ്ചയ്ക്കുശേഷം സ്ഥിതിഗതികൾ വിലയിരുത്തുമെന്നും, സർക്കാരിന്റെ പ്രതികരണം നിരീക്ഷിച്ച ശേഷമായിരിക്കും ഭാവി നടപടി തീരുമാനിക്കുകയെന്നും സംയുക്ത സമര സമിതി പറഞ്ഞു. സ്വകാര്യവൽക്കരണം പ്രാപ്തമാക്കുന്നതിനുള്ള നിയമങ്ങൾ ഭേദഗതി ചെയ്യുന്നതിനുള്ള ബിൽ പാർലമെന്റിന്റെ നിലവിലെ ശീതകാല സമ്മേളനത്തിൽ അവതരിപ്പിക്കാനാണ് സർക്കാർ ഉദ്ദേശിക്കുന്നത്.
ഓൾ ഇന്ത്യ ബാങ്ക് എംപ്ലോയീസ് അസോസിയേഷൻ (AIBEA), ഓൾ ഇന്ത്യ ബാങ്ക് ഓഫീസേഴ്സ് കോൺഫെഡറേഷൻ (AIBOC), നാഷണൽ കോൺഫെഡറേഷൻ ഓഫ് ബാങ്ക് എംപ്ലോയീസ് (NCBE), ഓൾ ഇന്ത്യ ബാങ്ക് ഓഫീസേഴ്സ് അസോസിയേഷൻ (AIBOA), ബാങ്ക് എംപ്ലോയീസ് കോൺഫെഡറേഷൻ ഓഫ് ഇന്ത്യ (BEFI) എന്നിവയാണ് UFBU-ലെ അംഗങ്ങൾ. ഇന്ത്യൻ നാഷണൽ ബാങ്ക് എംപ്ലോയീസ് ഫെഡറേഷൻ (INBEF), ഇന്ത്യൻ നാഷണൽ ബാങ്ക് ഓഫീസേഴ്സ് കോൺഗ്രസ് (INBOC), നാഷണൽ ഓർഗനൈസേഷൻ ഓഫ് ബാങ്ക് വർക്കേഴ്സ് (NOBW), നാഷണൽ ഓർഗനൈസേഷൻ ഓഫ് ബാങ്ക് ഓഫീസർസ് (NOBO) എന്നിവരാണ് സമരമുഖത്തുള്ള അസോസിയേഷനുകൾ.
Comments