കഴിഞ്ഞ സെപ്​തംബർ 14  ന് ആപ്പിള്‍ വലിയ ആഘോഷത്തോടെ പുറത്തിറക്കിയതാണ്  ഐഫോണ്‍ 13 . ഈ ഫോണ്‍ പരമ്പരയില്‍ ചില സുപ്രധാന ഫീച്ചറുകൾ കൊണ്ടുവന്നിരുന്നുവെങ്കിലും മുൻ മോഡലുമായി കാര്യമായ മാറ്റമൊന്നും തന്നെയില്ലെന്ന വിമര്‍ശനം അന്ന് തന്നെ ഉയര്‍ന്നിരുന്നു. നോച്ച് ചെറുതായി ചുരുക്കുകയും പിൻ ക്യാമറ ലെൻസുകളുടെ വിന്യാസം മാറ്റിയതുമൊഴിച്ചാൽ രൂപകൽപ്പനയിൽ കാര്യമായ മാറ്റമൊന്നും അന്ന് ആരും പറഞ്ഞിരുന്നില്ല.

എന്നാല്‍ ഈ ഫോണിനെതിരെ,  ആപ്പിള്‍ സഹസ്ഥാപകന്‍ സ്റ്റീവ് വോസ്നിയാക്ക് തന്നെ വിമര്‍ശനവുമായി രംഗത്ത് എത്തിയിരിക്കുന്ന സാഹചര്യമാണ് നിലവിൽ ഉള്ളത്.'തനിക്ക്​ പുതിയ ഐഫോൺ ലഭിച്ചിരുന്നുവെന്നും, മുൻ മോഡലുമായി ഇതിന്​ എന്തെങ്കിലും കാര്യമായ വ്യത്യാസമുണ്ടെന്ന്​ എനിക്ക്​ തോന്നുന്നില്ലെന്നും വോസ്​നിയാക്​ പറഞ്ഞു. ഇതിലുള്ള സോഫ്‌റ്റ്‌വെയർ പഴയ ഐഫോണുകൾക്കും ലഭിക്കുമെന്നത് നല്ലൊരു കാര്യമാണെന്ന്​ ഞാൻ കരുതുന്നതായും വോസ്​നിയാക്​ കൂട്ടിച്ചേർത്തു.

 പുതിയ ആപ്പിൾ വാച്ച് സീരീസ് ആയ  സീരീസ്​ 7 നെ പറ്റിയും സമാനാഭിപ്രായമാണ് അദ്ദേഹം പറഞ്ഞത്. പുതിയ ആപ്പിൾ വാച്ചും സീരീസ്​ 6-ൽ നിന്നും വ്യത്യസ്തമായി തോന്നുന്നില്ലെന്നും അദ്ദേഹം അഭിപ്രായപ്പെട്ടു.കമ്പനി 2021-ന്‍റെ നാലാം പാദത്തിൽ പ്രതീക്ഷിച്ച വരുമാനം നേടുന്നതിൽ പരാജയപ്പെട്ടിരുന്നു.

സ്വന്തം പേര്​ നിലനിർത്താൻ കഴിയുന്ന വിധത്തിൽ ആപ്പിൾ ഒരു ആരോഗ്യകരമായ കമ്പനിയായതിൽ സന്തോഷമുണ്ടെന്ന് ​അഭിമുഖത്തിനിടെ വോസ്നിയാക് ആപ്പിളിനെ അഭിനന്ദിച്ചു.