ഉത്തർപ്രദേശിലെ യമുന എക്‌സ്‌പ്രസ്‌വേയ്‌ക്ക് സമീപം 10,000 കോടി രൂപയുടെ ഫിലിം സിറ്റിയുടെ വികസനത്തിനുള്ള ബിഡ് നവംബർ 23-ന് തുറക്കുമെന്ന് യമുന എക്‌സ്‌പ്രസ്‌വേ ഇൻഡസ്ട്രിയൽ ഡെവലപ്‌മെന്റ് അതോറിറ്റി (യെയ്‌ഡ) സിഇഒ അരുൺ വീർ സിംഗ് പറഞ്ഞു. ഡിസംബർ 8 ന് ബിഡ്‌ഡിങ് അവസാനിക്കുമെന്നും അദ്ദേഹം അറിയിച്ചു.

1,000 ഏക്കർ സ്ഥലത്താണ് ഫിലിം സിറ്റി നിർമ്മിക്കുന്നത്. അതിൽ 740 ഏക്കറിൽ ചിത്രീകരണ പ്രവർത്തനങ്ങളും 40 ഏക്കർ സിനിമാ സ്ഥാപനങ്ങൾക്കും ഉണ്ടായിരിക്കുമെന്ന്  സിംഗ് പറഞ്ഞതായി വാർത്താ ഏജൻസി എഎൻഐ റിപ്പോർട്ട് ചെയ്തു. 120 ഏക്കറിൽ അമ്യൂസ്‌മെന്റ് പാർക്ക്, 40 ഏക്കറിൽ വാണിജ്യ വികസനം, 34 ഏക്കർ റീട്ടെയിൽ സ്ഥലത്തിനും 21 ഏക്കർ പഞ്ചനക്ഷത്ര ഹോട്ടലുകൾക്കും, 40 ഏക്കർ വീതം പാർപ്പിട ആവശ്യങ്ങൾക്കും ലോകോത്തര ഫിലിം ഇൻസ്റ്റിറ്റ്യൂട്ടുകൾക്കുമായി നീക്കിവയ്ക്കണം എന്നാണ് അതോറിറ്റിയുടെ  പദ്ധതി. ഇത് ഉത്തർപ്രദേശിൽ ചലച്ചിത്ര നിർമ്മാണത്തിന് മറ്റൊരു കേന്ദ്രം സൃഷ്ടിക്കുമെന്നും സംസ്ഥാനത്തെ ടൂറിസം വർദ്ധിപ്പിക്കുമെന്നും പ്രതീക്ഷിക്കുന്നതായി കരുതുന്നു.ഇവിടെ സിനിമയുടെ നിർമ്മാണം ചിത്രീകരണവും 2024 മുതൽ ആരംഭിക്കാനാകും എന്നാണ് പ്രതീക്ഷിക്കുന്നത്.

ഉത്തർപ്രദേശിലെ ഫിലിം സിറ്റിയുടെ വികസനത്തിന് മൂന്ന് മാതൃകകളാണ് നിർദ്ദേശിച്ചിരിക്കുന്നത്. ഡവലപ്പർ സംസ്ഥാനത്തിനും അതോറിറ്റിക്കും  ഒരു നിശ്ചിത തുക വാടക നൽകുക എന്നതാണ് ആദ്യ മാതൃക. രണ്ടാമത്തെ മോഡൽ സൂചിപ്പിക്കുന്നത് ഡവലപ്പർ സംസ്ഥാനത്തിനും അതോറിറ്റിക്കും ഓഹരി നൽകുമെന്നും മൂന്നാമത്തെ മോഡൽ ഡെവലപ്പറെ പ്രതിവർഷം ലാഭത്തിന്റെ ഒരു വിഹിതം നൽകാൻ അനുവദിക്കുന്നു എന്നതുമാണ്. ഏത് മാതൃകയാണ് നിർദ്ദേശിക്കേണ്ടതെന്ന് സർക്കാർ ആലോചിച്ച് തീരുമാനിക്കും.